«ԹԱՐԳՄԱՆՉԱՑ ՏՕՆ» ԹԱՐԳՄԱՆՉԱՑ ՎԱՐԺԱՐԱՆԻ ՄԷՋ

Ինչպէս ամէն տարի, այս տարի եւս վարժարանիս երդիքին տակ յիշատակեցինք Թարգմանիչ վարդապետները եւ տօնեցինք «Թարգմանչաց»ը: Հոկտեմբերի 07-11 թուականներուն՝ իւրաքանչիւր օրուայ համար մէկ դասաժամը տրամադրեցինք զանազան մշակութային գործունէութիւններուն:

Մեր առաջին գործունէութիւնը եղաւ՝ ,վարժարանիս երաժշտութեան ուսուցչուհի Սէրտա Քէպապճըի հսկողութեան ներքեւ՝ վարիչներով, ուսուցիչներով եւ նախակրթարանի, միջնակարգի բոլոր աշակերտներով համախմբուիլ վարժարանիս սրահին մէջ եւ «Հայերէն Երգենք» խորագիրի տակ սորվիլ եւ միասնաբար երգել «Ոսկետառ»ն ու «Խնջոյքի Երգ»ը:

Երկրորդ գործունէութեան ծրագիրն էր բեմի վրայ զրուցել աշակերտներուն հետ: Հետեւաբար համախմբուեցանք սրահին մէջ եւ մէկ առ մէկ բեմ հրաւիրեցինք իւրաքանչիւր դասարանէն աշակերտ մը, որուն հետ զրուցեցինք զանազան նիւթերու շուրջ, մանաւանդ հայերէնի վրայ:

Յաջորդ օր ուսուցիչներով եւ աշակերտներով համախմբուեցանք վարժարանիս պարտէզին մէջ եւ շուրջպար բռնեցինք վարժարանիս դասարանի ուսուցչուհի՝ Դալար Քէօսէօղլուի հսկողութեան ներքեւ:

Հինգշաբթի կրկին համախմբուեցանք սրահին մէջ եւ վարժարանիս Հայերէնի ուսուցչուհի՝ Թալին Չորթան Կարիպկիւն՝ ՓՈՔՐԻԿ հէքեաթարանէն իր գրի առած «Վարդի Փուշը» հէքեաթը պատմեց աշակերտներուն:

11 Հոկտեմբեր 2019, Ուրբաթ՝ «Թարգմանչաց Տօն եւ Մշակոյթ» խորագրեալ միջվարժարանային Ե. տօնակատարութիւնը կազմակերպեցինք: Բացման ու փակման խօսքը արտասանեց, Ը. Դասարանի աշակերտ՝ Նարեկ Թովմասեան: Յայտագիրը սկսաւ ժամը՝ 10.00-ին, տեւեց մինչեւ 14.00: Իւրաքանչիւր վարժարանէն (Գ.,Դ. եւ Ը. դասարաններէն) տասը աշակերներ,  իրենց ուսուցիչներուն հետ ժամանեցին Թարգմանչաց վարժարան եւ մասնակցեցան վարժարանիս ուսուցիչներուն հսկողութեան տակ ՝ «Երաժշտութիւն», «Պար», «Գծագրութիւն»,  «Խոհանոց»,  «Հայերէն Խաղանք» եւ «Հայերէնը Համացանցի Վրայ» խորագրեալ աշխատութիւններուն: Գործունէութիւնները աւարտելէ ետք, իւրաքանչիւր աշխատութիւնը ցուցադրուեցաւ բեմի կամ պաստառի վրայ:

Թարգմանչաց վարժարանի Ը. Դասարանի աշակերտները ներկայացուցին «Այբուբենի Տարեդարձը» խորագրեալ թատերակը:

Տիկին Թագուհի Զաման երեմուկով հրուշակ եփեց բեմի վրայ, մէկ մէկ յիշատակելով՝ Սուրբ Մեսրոպ Մաշտոցը, Սուրբ Սահակ Պարթեւը, բոլոր  Թարգմանիչ վարդապետները եւ մեզմէ անդարձ բաժնուողները:

Տօնակատարութեան աւարտին, որպէս յուշանուէր՝ մէյմէկ բազզըլ բաժնեցինք քոյր վարժարաններուն, որուն վրայ կը գտնուէր Կոմիտասի նկարը:

Գործունէութիւնները անգամ մը եւս միասնութեան ոգեւոր մթնոլորտ ստեղծեց աշակերտներու միջեւ: Բոլորը շատ ուրախ բաժնուեցան վարժարանէս:

 



Tel: (212) 261 77 51
Bizimle İletişime Geçin
Facebook Flickr Twitter Feed Technorati
Tarkmanças 2012 Tüm Hakları Saklıdır