ՄԻՋԱԶԳԱՅԻՆ ՄԱՅՐԵՆԻԻ ՕՐ

21 Փետրուար 2019, Հինգշաբթի, ժամը 17.00 - 18.30-ին  «Մայրենիդ Անունդ է» կարգախօսով տօնեցինք «Միջազգային Մայրենիի օր»ը վարժարանիս հանդիսասրահին մէջ:

Հանդիսութեան ներկայ էին՝ վարժարանիս հիմնադիր՝ Հայկ Արսլանեան, Օրթագիւղի Սուրբ Աստուածածին եկեղեցւոյ Թաղային Խորհուրդի Ատենապետ՝ Իսքէնտէր Շահինկէօզ, Մարմարա օրաթերթի խմբագրապետ՝ Ռոպէր Հատտէճեան, Մարմարա օրաթերթի փոխ խմբագրապետ Մաքրուի Պ. Յակոբեան, ասմունքող՝ Սիլվա Կոմիկեան, վարժարանիս տնօրէն Արաս Տէլիճէ, նախկին տնօրէնուհի՝ Մարի Նալճը, կրթական մշակներ, ծնողներ եւ աշակերտներ: Օրուան հանդիսավարն էր վարժարանիս Հայերէնի ուսուցչուհի՝ Թալին Չորթան Կարիպկիւն:

Տօնակատարութիւնը սկսաւ Զ. Դասարանի աշակերտներու ելոյթով: Անոնք պտոյտ մը կատարեցին բեմի վրայ այցելելով Հայաստանի Պանթէոնի մէջ գտնուող, զանազան նշանաւոր հայերուն արձանները, ու արտայայտուեցան օգտուելով՝ Օր. Մաքրուհի Պ. Յակոբեանի «Մանկութեանս փողոցներուն մէջ» գիրքէն:

Է. դասարանի աշակերտ՝ Նարեկ Թովմասեան, դաշնակի վրայ նուագեց «Արամ Խաչատուրեան»ի «Andantino»ն:

Զ. դասարանի աշակերտները «Ես Հայ եմ» խորագրեալ ելոյթ մը ունեցան, օգտուելով Մարմարա օրաթերթի խնբագրապէտ՝ Ռոպէր Հատտէճեանի յուշատետրէն:

Է. դասարանի աշակերտներէն դիտեցինք, «Ինչո՞ւ պէտք է խօսինք Հայերէն»: «Ի՞նչ կը նշանակէ մայրենի լեզու» հարցումներուն պատասխանները պաստառի վրայ:

Է. դասարանի աշակերտները,աշխարհահռչակ գիտնականներուն եւ գրիչներուն հայերէնի վերաբերեալ գաղափարներն ու զգացումները հաղորդեցին պաստառի վրայ:

Ը. Դասարանի աշակերտները ներկայացուցին, վարժարանիս Հայերէնի ուսուցչուհի՝ Մարի Գալայճըի կողմէ գրուած «Աշխարհը բեմ է, մարդիկ դերակատարներ» խորագրեալ թատերակը:

Վարժարանիս միջնակարգի ուսուցիչ եւ ուսուցչուհիները, Ատրինէ Գաբրիէլեանի կողմէ քաղուած՝ «Ի՞նչ կը նշանակէ հայ ըլլալ» հարցումին անստորագիր հեգնական պատասխանները արտասանեցին պաստառի վրայ:

Վարժարանիս երգչախումբը երգեց «Խնջոյքի երգ», «Հին կա'լլայ» եւ «Սարի Սիրուն Եար» երգերը: «Սարի Սիրուն Եար»ը մեներգեց  Է. դասարանի աշակերտուհի՝ Լիզա Կիւլպէնքօղլու, Ը. դասարանի երկու աշակերտուհիներ՝ Նայիրի Պէնլիօղլուի եւ Նարօտ Մէնթէշէի պարի ընկերակցութեամբ:

«Իմ Լեզուս» խորագրեալ երգը, Է. դասարանի աշակերտ՝ Արտա Սուսուփ նուագեց դաշնակի վրայ, իսկ մեներգեց Զ. Դասարանի աշակերտուհի՝ Միրա Աւատան, որուն երաժշտութիւնը յօրինած է Ռոպէր Տողանայ, իսկ խօսքերը գրած է Օր. Մաքրուհի Պ. Յակոբեան:

Պոլսահայ վաստակաշատ ասմունքող Սիլվա Կոմիկեան, իր հնչեղ ձայնով, յատուկ առոգանութեամբ ու գեղեցիկ ներկայացումով ասմունքեց Ռոպէր Հատտէճեանի «Մեսրոպ»ը, Սիլվա Կապուտիկեանի «Հող Հայրենի»ն եւ Պարոյր Սեւակի «Քիչ ենք, բայց հայ ենք»ը:

Աշակերտներու ձեռամբ յանձնուեցաւ՝ Օր. Մաքրուհի Պ. Յակոբեանին, Տկն. Սիլվա Կոմիկեանին եւ Պրն. Ռոպէր Հատտէճեանին շնորհակալագիրերը:

Յայտագիրը վերջ գտաւ Ռոպէր Հատտէճեանի սրտի խօսքով:

Մայրենի Լեզուի նուիրուած վերոյիշեալ հանդէսը շատ խանդավառ մթնոլորտ ստեղծեց ներկաներուն:



Tel: (212) 261 77 51
Bizimle İletişime Geçin
Facebook Flickr Twitter Feed Technorati
Tarkmanças 2012 Tüm Hakları Saklıdır